Þórir: Gæti ekki verið stoltari

„Þetta var virkilega góður leikur. Við þurftum að vinna þennan leik og gerðum það svo sannarlega,“ sagði glaðlyndur Þórir Guðjónsson, framherji Fjölnis, við mbl.is eftir að liðið sigraði Fram 3:1 á Laugardalsvellinum í kvöld.

Með sigrinum komst Fjölnir upp úr fallsæti á meðan Fram situr eftir í 11. sæti deildarinnar, stigi á eftir þeim gulklæddu. 

„Markmiðið fyrir leik var að halda skipulagi eins lengi og við mögulega gátum. Við vildum ekki hleypa þessu upp í neina vitleysu. Eftir markið fengum við aukið sjálfstraust og gengum á lagið,“ útskýrði Þórir.  

Þórir lék sinn besta leik í sumar en hann gekk í raðir Fjölnis frá Val í fyrrasumar. Hann skoraði laglegt mark í fyrri hálfleik og í þeim síðari lagði hann upp mark fyrir Ragnar Leósson með góðum undirbúningi.  

„Ég held að þetta hafi verið minn besti leikur í sumar sem og hjá liðinu,“ sagði Þórir þegar talið barst að honum sjálfum. „Við spiluðum frábærlega í kvöld og ég gæti ekki verið stoltari.“

• Blogga um frétt