Rúnar Már Sigurjónsson leikmaður sænska liðsins Sundsvall og Ólafur Ingi leikmaður Zulte Waregem hafa verið kallaðir inn í íslenska landsliðshópinn í knattspyrnu fyrir vináttuleikinn gegn Eistum á þriðjudaginn.
Rúnar Már hefur spilað 3 leiki með A-landsliðinu og skoraði í þeim eitt mark en Ólafur Ingi hefur spilað 24 leiki og skoraði eitt mark.
Eins og áður hefur komið fram á mbl.is hafa fyrirliðinn Aron Einar Gunnarsson og Eiður Smári Guðjohnsen dregið sig út úr landsliðshópnum en Aron er nýorðinn faðir og fór auk þess veikur af velli eftir rúmar 70 mínútur í Astana í gær. Eiður Smári Guðjohnsen er líka á heimleið en hann og eiginkona hans eiga von á barni á hverri stundu.