Selfoss síðasta liðið í undanúrslit

Selfyssingar tryggðu sér í kvöld fjórða og síðasta sætið í undanúrslitum Lengjubikars kvenna í knattspyrnu með því að sigra ÍBV, 4:2, í lokaleik A-deildarinnar á Jáverkvellinum á Selfossi.

Þar með er ljóst að Breiðablik mætir Þór/KA og Stjarnan mætir Selfossi í undanúrslitum á laugardaginn en Breiðablik fékk 15 stig, Stjarnan 9, Selfoss 9, Þór/KA 6, Fylkir 3 og ÍBV 3 stig. 

ÍBV þurfti sjö marka sigur til að komast áfram á kostnað Selfyssinga og það var aldrei í spilunum. Selfoss var 2:1 yfir í hálfleik og eftir að Natasha Anasi hjá ÍBV fékk rauða spjaldið snemma í seinni hálfleik var á brattann að sækja fyrir Eyjakonur.

Guðmunda Brynja Óladóttir skoraði tvö marka Selfyssinga, Eva Lind Elíasdóttir og Donna Henry sitt markið hvor. Shaneka Gordon skoraði bæði mörk ÍBV.

• Blogga um frétt