„Þetta er slæm tognun á liðbandi í ökkla, ekkert brotið eða slitið, og hann ætti að vera frá keppni í 6-8 vikur. Þetta fór á besta veg fyrir okkur,“ sagði Heimir Guðjónsson, þjálfari FH, um meiðsli belgíska bakvarðarins Jonathans Hendrickx.
Hendrickx fór meiddur af velli á 78. mínútu í 3:1-sigri FH á KR í fyrrakvöld. Óttast var að hann hefði ökklabrotnað en nú standa vonir til að Belginn geti snúið aftur til keppni í júní. „Þetta er samt gríðarlega svekkjandi, bæði fyrir okkur og hann sjálfan. Jonathan er frábær leikmaður og sýndi það í þann tíma sem hann spilaði í leiknum gegn KR. Að mínu mati er hann langbesti hægri bakvörðurinn í deildinni,“ sagði Heimir við Morgunblaðið í gær.
FH-ingar hafa verið afar óheppnir með meiðsli bakvarða undanfarin misseri en Sam Tillen missti til að mynda af öllu síðasta tímabili og Guðjón Árni Antoníusson gat sáralítið spilað.