„Það alltaf svekkjandi að tapa og miðað við hvernig við byrjuðum leikinn er ég óánægður með að fá allavega ekki eitt stig,“ sagði Jörundur Áki Sveinsson, þjálfari Fylkis, í samtali við mbl.is. eftir að lið hans tapaði 3:1 gegn Val í kvöld í 3. umferð Pepsi-deildar kvenna í knattspyrnu. Fylkir hefur tapað tveimur leikjum í röð og er með 3 stig eftir þrjá leiki.
Jörundi fannst svekkjandi að Valur skyldi komast aftur yfir eftir að hans stúlkur höfðu jafnað í 1:1 í upphafi síðari hálfleiks. „Við lendum í því að fá mark á okkur undir lok fyrri hálfleiks og förum vel yfir málin í hálfleik og skorum mark og fannst leikurinn þá í góðu jafnvægi. Við vorum þá komnar með örlitla yfirhönd en fáum á okkur mark skömmu síðar og svo þriðja og það gerði út um leikinn.“
Liðið er með þrjá útlendinga og þær byrja allar á bekknum. „Ég er ekki alveg nógu ánægður með þær. Þær voru fengnar til að styrkja hópinn og verða bara að gera betur.“
Er hann ósáttur við stigasöfnun liðsins í upphafi móts? „Við erum búin að vera í erfiðu prógrammi. Síðustu tveir leikir hafa ekki verið nógu góðir en það er stutt í næsta leik og við verðum að bretta upp ermar og þjappa okkur saman. Við erum svolítið á eftir þessum liðum, Valur er með 9 stig og við 3. Við erum því svolítið að elta þessi lið sem við erum að reyna að bera okkur saman við,“ sagði Jörundur Áki.