Ásmundur Arnarsson er hættur sem þjálfari Pepsi-deildarliðs Fylkis í knattspyrnu karla, en þetta var staðfest í tilkynningu frá félaginu nú rétt í þessu.
Ásmundur tók við Fylki árið 2012 eftir að hafa áður þjálfað Fjölni. Árbæingar eru í 7. sæti deildarinnar sem stendur og eru úr leik í bikarnum eftir 4:0-tap fyrir ÍBV um helgina.
Tilkynning Fylkis í heild sinni:
Stjórn Knattspyrnudeildar Fylkis og Ásmundur Arnarsson hafa komist að samkomulagi um að Ásmundur láti af störfum sem þjálfari mfl. Fylkis frá og með deginum í dag.
Fylkir vill þakka Ásmundi fyrir samstarfið á undanförnum árum og óskar Ásmundi velgengis í framtíðinni.
Ásmundur þakkar leikmönnum og stuðningsmönnum Fylkis fyrir samstarfið á undanförnum árum og óskar Fylki alls hins besta á komandi árum.