Sögulegur sigur Þórs/KA - burstuðu Val

Þór/KA fór illa með Val í Pepsi-deild kvenna í kvöld. Leikurinn var í jafnvægi lengi vel en Þór/KA náði að skora tvívegis í fyrri hálfleik. Í seinni hálfleiknum var heimaliðið töluvert sterkara og bætti við þremur mörkum.

Mörkin fimm voru hvert öðru glæsilegra en fjögur þeirra komu eftir fyrirgjafir af köntunum. Sarah M Miller átti góðan dag en hún lagði upp þrú mörk og skoraði eitt. Hin mörkin skoruðu Klara Lindberg, Sandra María Jessen og Kayla Grimsley sem skoraði tvívegis.

Sigurinn er sögulegur því þetta var fyrsti sigur Þórs/KA á Val á Akureyri. Hann kom Þór/KA aftur í baráttuna um þriðja sætið í deildinni en liðið hafði aðeins fengið tvö stig í síðustu fimm deildarleikjum.

Fylgst var með gangi mála í beinni textalýsingu hér á mbl.is en leikurinn var frestaður leikur úr 7. umferð deildarinnar.