KA hefur fengið Pétur Heiðar Kristjánsson til liðs við sig og mun hann leika með félaginu út þessa leiktíð, en hann var áður spilandi þjálfari hjá Dalvík/Reyni.
Pétur er fæddur árið 1982 og er uppalinn hjá Þór og hefur einnig leikið með Leiftri/Dalvík, Keflavík og Hömrunum/Vinum hér á landi, en einnig verið á mála hjá liðum í Danmörku og Noregi.
„KA-menn eru gríðarlega ánægðir með þennan liðstyrk en Peddi, eins og hann er oft kallaður, þekkir innviði félagsins vel enda hefur hann þjálfað yngri flokka þess við góðan orðstír,“ segir í tilkynningu á heimasíðu KA.