„Þetta var ekki nógu gott hjá okkur. Fyrri hálfleikurinn var betri en sá seinni, sem er kannski ólíkt því sem það hefur verið hjá okkur í sumar,“ sagði Dagný Brynjarsdóttir, leikmaður Selfoss, eftir 1:3 tap á heimavelli gegn Stjörnunni í Pepsi-deild kvenna í kvöld.
Selfyssingar byrjuðu leikinn vel, en Donna Kay Henry kom heimamönnum yfir áður en Stjarnan mætti til leiks. Ásgerður Stefanía jafnaði metin áður en markamaskínan, Harpa Þorsteinsdóttir, gerði tvö mörk og gerði út um leikinn.
„Ég veit ekki hvort það hafi verið þreyta. Það eru þrír dagar síðan við spiluðum bikarleikinn gegn Val en ég held samt að menn hafi ekki átt erfitt með að gíra sig í þennan leik í kvöld. Ef svo hefur verið þá þurfa þeir leikmenn að skoða sín mál. Ég held að það sé ekki hægt að tala um spennufall frá því á laugardaginn. Þetta eru tvö ólík mót, deild og bikar, og menn eiga alveg að geta kúplað sig aftur inn í deildina,“ sagði Dagný í samtali við mbl.is.
En hvað var að hrjá Selfyssinga í kvöld?
„Síðast þegar við spiluðum við Stjörnuna þá vorum við yfir í baráttunni. Nú vorum við ekki nógu nálægt mönnum, vorum að falla frá þeim og leyfðum þeim að spila alltof auðveldlega í kringum okkur. Seinni tvö mörk Stjörnunnar eru mjög aulaleg hjá okkur, algjört samskiptaleysi þannig að það á að vera auðvelt að koma í veg fyrir svona mörk.“
Lið Selfoss virtist nokkuð lemstrað í kvöld, Summer Williams fór meidd útaf í fyrri hálfleik og sjálf var Dagný farin að haltra snemma leiks.
„Ég fékk hné í lærið strax á 5. mínútu og ég viðurkenni að á tímabili þurfti ég að æla, ég fann svo mikið til. Þetta var örugglega versta hné í læri sem ég hef fengið en það eru tvær vikur í næsta leik og ég verð orðin klár þá.“
Fyrir leikinn í kvöld var talað um hann sem upphitun fyrir bikarúrslitaleikinn þar sem Selfoss og Stjarnan mætast í lok ágúst. Dagný á ekki von á svipuðum leik þá.
„Nei, þá förum við náttúrulega og vinnum þær. Það er bara 1-1 í deild en besta liðið mun vinna á Laugardalsvellinum og það kemur í ljós þá hvort liðið það er.“