Haukar upp í fjórða sætið

Haukar komust í kvöld upp í fjórða sæti 1. deildar karla í knattspyrnu eftir öruggan sigur á Selfossi, 3:0, þegar liðin mættust í Hafnarfirði í kvöld.

Björgvin Stefánsson skoraði tvívegis fyrir Hauka og Zlatko Krickic eitt, en staðan í hálfleik var 2:0. Björgvin var í vikunni valinn í U21 árs landslið Íslands í fyrsta sinn og hefur nú skorað sautján mörk fyrir Hauka í nítján leikjum í deildinni og er þar markahæstur.

Selfoss er enn í bullandi fallbaráttu, tveimur stigum fyrir ofan Gróttu sem er í næstneðsta sætinu. Fylgst var með gangi mála í beinni lýsingu hér á mbl.is.

90. Leik lokið.

87. Mark! Staðan er 3:0 fyrir Hauka. Að sjálfsögðu er það Björgvin Stefánsson sem skorar, sitt annað mark í leiknum.

46. Síðari hálfleikur er hafinn. Gunnar Borgþórsson gerir tvær breytingar á liði Selfyssinga í upphafi síðari hálfleiks og freistar þess að snúa leiknum en Selfoss þarf á stigum að halda í baráttunni fyrir áframhaldandi sæti í deildinni. 

45. Staðan er 2:0 að loknum fyrri hálfleik.  

43. Mark! Staðan er 2:0 fyrir Hauka. Hafnfirðingar bæta við öðru marki fyrir hlé á gömlu markamínútunni. Zlatko Krickic skoraði markið samkvæmt netmiðlinum Úrslit.net. 

22. Mark! Staðan er 1:0. Haukar eru komnir yfir og hver annar en Björgvin Stefánsson skorar, hans sextánda mark í sumar og fagnar sæti sínu í U21 árs landsliðinu með stæl!

1. Leikurinn er hafinn.

0. Byrjunarliðin eru klár og þau má sjá hér að neðan.

• Blogga um frétt