Forráðamenn Ajax hugðust halda sérstaka kveðjuathöfn fyrir Kolbein Sigþórsson í hálfleik í stórleiknum við PSV á Amsterdam Arena í gær.
Kolbeinn lék í fjögur ár með Ajax og varð þrívegis hollenskur meistari með liðinu. Hann flutti sig hins vegar um set í sumar og gekk í raðir Nantes í Frakklandi. Lítið varð hins vegar úr kveðjuathöfninni vegna þess að flugi Kolbeins til Hollands seinkaði um klukkustund vegna þoku:
„Ég gat bara séð síðustu 20 mínúturnar af leiknum,“ sagði Kolbeinn, sem þakkaði öllum hjá Ajax fyrir fjögur frábær ár. Hann kíkti inn í búningsklefa til gömlu liðsfélaganna eftir leik, en þar var lítil stemning eftir 2:1-tap.
Kolbeinn getur gert nokkrum af gömlu liðsfélögum sínum stóran greiða eftir viku þegar Ísland mætir Tyrklandi í lokaumferð undankeppni EM. Holland er nefnilega í harðri baráttu við Tyrkland um 3. sæti riðilsins, sem gefur þátttökurétt í umspili.