Magnús Már Lúðvíksson, leikmaður Fram í 1. deild karla í knattspyrnu, hefur ákveðið að leggja skóna á hilluna en þetta staðfesti hann við knattspyrnumiðilinn Fótbolta.net í dag.
Magnús, sem er 34 ára gamall, spilaði 20 leiki og skoraði 3 mörk fyrir Fram í 1. deildinni í sumar en hann var spilandi aðstoðarþjálfari með liðinu.
Hann er uppalinn í KR og varð meðal annars Íslands- og bikarmeistari með liðinu árið 2011 og vann þá bikarinn árið 2012 einnig með liðinu. Hann hefur þá leikið með liðum á borð við Val, ÍBV, Þrótti og Fjölni.
„Ég fór fram á það að losa mig undan samning frá Fram þar sem ég ætla að leggja skóna á hilluna. Þá getur nýr þjálfari (Ásmundur Arnarsson) valið sér sinn aðstoðarmann,“ sagði Magnús við Fótbolta.net í dag.