Nú er orðið ljóst hvaða þjóðum íslenska kvennalandsliðið í knattspyrnu mætir í hinum árlega Algarve-bikar í Portúgal í byrjun mars, fjórum og hálfum mánuði fyrir EM í Hollandi.
Ísland er í B-riðli með Japan, Noregi og Spáni í Algarve-bikarnum að þessu sinni. Japan er í 8. sæti heimslistans og varð heimsmeistari árið 2011, Noregur er í 11. sæti, Spánn í 14. sæti og Ísland í 16. sæti.
Tólf þjóðir taka þátt í mótinu í stað átta síðasta vor, og er leikið í þremur riðlum. Í A-riðli leika Kanada, Danmörk, Portúgal og Rússland, en í C-riðli eru Ástralía, Kína, Holland og Svíþjóð.
Engin þeirra þjóða sem Ísland er í riðli með á EM í sumar leikur í Algarve-bikarnum að þessu sinni, en Ísland er í C-riðli með Frakklandi, Austurríki og Sviss á EM. Spánn er þar í D-riðli og Noregur í A-riðli.