Elísa Viðarsdóttir, landsliðskona í knattspyrnu, meiddist í upphafi leiks Íslands og Hollands sem fram fór ytra í vikunni. Leikurinn var vart byrjaður þegar Elísa fékk högg á hnéð og lá hún sárþjáð eftir.
Mbl.is sló á þráðinn til Elísu í dag, en hún fer í myndatöku eftir helgi.
„Ég fer í myndatöku eftir helgi og þá fæ ég að vita meira. Ég bíð núna og vona það besta. Hnén á mér hafa yfirleitt verið í lagi, en undanfarið byrjaði ég að finna aðeins fyrir. Ég sneri svo eitthvað upp á hnéð og þetta var rosalega vont.“
Séu meiðslin alvarleg gæti Elísa þurft að bíta í það súra epli að missa af EM í Hollandi í sumar.
„Auðvitað er EM það fyrsta sem maður hugsar þegar maður lendir í svona, en maður má ekki hugsa of langt. Ég veit svo lítið um þessi meiðsli eins og er. Ég vona að þetta sé liðþófinn sem er skaddaður, frekar en krossböndin,“ sagði Elísa.