Ægir sló Þór út úr bikarnum

Ægir úr Þorlákshöfn, sem leikur í 3. deild, gerði sér lítið fyrir og sló 1. deildarlið Þórs út í 32 liða úrslitunum í bikarkeppni karla í knattspyrnu á Þórsvellinum í kvöld, eftir vítaspyrnukeppni.

Hetja Ægismanna var markvörðurinn Magnús Kristófer Anderson sem hélt hreinu í 120 mínútur en leikurinn endaði 0:0 eftir framlengingu, og hann varði síðan fjórðu vítaspyrnu Þórsara frá Orra Sigurjónssyni. Leikmenn liðanna skoruðu úr öllum öðrum spyrnum og það var Þorkell Þráinsson sem skoraði úr síðustu spyrnu Ægismanna og tryggði þeim 5:3 sigur í vítakeppninni.