„Ég er mjög sátt með frammistöðu liðsins og mína eigin,“ sagði Berglind Björg Þorvaldsdóttir, framherji Breiðabliks, við mbl.is eftir þrennu í 6:0 sigri liðsins á KR á Kópavogsvelli í kvöld.
Það er ljóst að Berglind er á markaskónum þessa dagana en er það EM-fiðringurinn sem er að kitla markanefið?
„Ég hugsa fyrst og fremst um að spila fyrir Breiðablik,“ segir Berglind.
Sjá frétt mbl.is: Stórsigur Breiðabliks á heimavelli
Hún segir að þótt sigurinn hafi verið stór hafi þær þurft að hafa fyrir sigrinum.
„Við þurftum klárlega að hafa fyrir þessu en við mættum vel stemmdar til leiks í dag og spiluðum mjög vel frá fyrstu mínútu og út allan leikinn. Ég er mjög sátt með það hvernig við vorum í dag.“
En var eitthvað við leik liðsins í dag sem Berglindi fannst ekki alveg nógu gott?
„Við hefðum kannski getað skorað fleiri mörk!“