Skagamenn unnu sinn fyrsta sigur í Pepsi-deild karla í knattspyrnu í ár þegar þeir unnu ÍBV 4:1 á Hásteinsvelli í Vestamannaeyjum í dag. Frábær mörk litu dagsins ljós í leiknum sem var hinn fjörugasti.
Arnar Már Guðjónsson kom Skagamönnum á bragðið með stórkostlegu marki rétt fyrir lok fyrri hálfleiks en þá fékk hann boltann rétt fyrir utan teig og klippti hann í netið. Staðan 0:1 í hálfleik.
Skagamenn komust svo í 2:0 strax á 48.mínútu með marki beint úr aukaspyrnu frá Þórði Þorsteini Þórðarsyni.
Eyjamenn voru ekki lengi að svara en Pablo Punyed skoraði einnig beint úr aukaspyrnu á 50.mínútu stöngin inn. Staðan því skyndilega orðin 1:2.
Hafsteinn Briem fékk svo rautt spjald fyrir brot á Alberti Hafsteinssyni á 80 mínútu og ÍA fékk víti sem Tryggvi Hrafn tók en Halldór Páll Geirsson varði.
Skagamenn voru ekki hættir heldur bættu við tveimur mörkum á síðustu 5 mínútunum. Fyrst var það Albert Hafsteinsson og svo skoraði Tryggvi Hrafn á 90 mínútu fjórða markið.
4:1 sigur ÍA og þeirra fyrsti sigur kominn í hús.