Fylkir fagnar 50 ára afmæli á toppi 1. deildar karla í knattspyrnu, Inkasso-deildarinnar, eftir öruggan sigur á HK í Kórnum í dag, 3:0, en Árbæjarfélagið var stofnað þennan dag árið 1967.
Fylkismenn eru komnir með 10 stig eftir fyrstu fjórar umferðirnar, á undan Þrótti sem er með níu stig og Fram sem er með 8 stig. HK er í sjötta sætinu með 6 stig.
Eftir jafnan fyrsta hálftímann þar sem HK byrjaði betur en Fylkir náði smám saman undirtökunum kom Emil Ásmundsson Árbæingum yfir á 31. mínútu með góðu skoti af 20 m færi með jörðu í vinstra hornið.
Rothöggið kom svo undir lok fyrri hálfleiks þegar Fylkir bætti við tveimur mörkum. Albert Brynjar Ingason skoraði eftir snögga sókn á 42. mínútu og um níu sekúndum seinna gerði Emil sitt annað mark, aftur með skoti af 20 metra færi og nú var það þrumufleygur í hægra hornið. Staðan var því 3:0 fyrir Fylki í hálfleik.
HK-ingar náðu aldrei að ógna þessari forystu Árbæinga í seinni hálfleiknum og þeir sigldu því sigrinum heim af öryggi. Bæði lið fengu ágæt færi en mörkin urðu ekki fleiri.