Úlfur Blandon, þjálfari Vals, var að vonum sáttur eftir sannfærandi 5:0 sigur liðs síns gegn KR á Alvogen-vellinum í 9. umferð Pepsi-deildar kvenna í knattspyrnu í kvöld.
„Ég er fyrst og fremst ótrúlega stoltur af stelpunum í dag. Mér fannst við standa okkur feykilega vel og liðsheildin skilaði þessum sigri í dag.“
Þessi fimm marka sigur var síst of stór en Valskonur voru gífurlega öflugar í kvöld. Úlfur segist hafa verið búinn að kortleggja KR-liðið vel.
„Við skorum snemma og þá er erfitt fyrir andstæðinginn að koma til baka. Við vorum búin að greina KR-liðið vel og reyndum að sækja í ákveðin svæði og við uppskerum þrjú mörk upp úr því.“
Eftir erfiða byrjun á mótinu, Valur tapaði þremur af fyrstu fjórum leikjum sínum, hefur liðið nú unnið fimm deildarleiki í röð, hefur eitthvað breyst?
„Í rauninni hefur ekkert breyst, ég nenni ekki að fara að grafa aftur í byrjun tímabils, en við erum búin að vinna sex leiki í röð og við einbeitum okkur að einum leik í einu.“
Mikið er um meiðsli í herbúðum Vals en þær Margrét Lára Viðarsdóttir, Elísa Viðarsdóttir og Dóra María Lárusdóttir hafa allar slitið krossband í sumar og verða lengi frá. Úlfur er þó ánægður með breidd liðsins og þá leikmenn sem hafa komið inn í liðið.
„Þegar við vinnum 5:0 hafa þeir leikmenn sem koma inn staðið sig frábærlega. Það er vont að missa leikmenn í meiðsli en það kemur maður í manns stað.“
Getur Valur enn þá orðið Íslandsmeistari?
„Við erum ekkert að spá í það núna. Við tökum einn leik í einu og reynum að sýna góða spilamennsku. Ég er ánægður með stuðning áhorfenda í dag sem voru ánægðir með okkur og fögnuðu með okkur að leikslokum. Við erum að reyna að búa til ákveðna stemningu og hafa gaman af fótbolta.