Tveir Fjölnismenn og einn Valsmaður taka út leikbann þegar liðin mætast í fyrsta leik 9. umferðar Pepsideildar karla í knattspyrnu í Grafarvogi á laugardag. Igor Jugovic var í gær úrskurðaður í eins leiks bann vegna fjögurra áminninga, og félagi hans í Fjölni, Mario Tadejevic, fékk eins leiks bann eftir rauða spjaldið gegn ÍA í fyrrakvöld. Bjarni Ólafur Eiríksson, Val, fékk sömuleiðis eins leiks bann vegna rauða spjaldsins gegn KA í síðustu umferð.
Brynjar Ásgeir Guðmundsson missir af leik Grindavíkur við Breiðablik í Kópavogi á mánudag, vegna fjögurra áminninga. Kenan Turudija missir sömuleiðis af leik Víkings Ó. gegn Víkingi R. í Fossvoginum. Þá fékk Kaj Leo í Bartalsstovu eins leiks bann vegna rauðs spjalds gegn Grindavík og missir af leik ÍBV við FH á sunnudag.