Kristinn kominn til Breiðabliks

Vinstri bakvörðurinn Kristinn Jónsson er genginn til liðs við knattspyrnulið Breiðabliks og mun spila með liðinu til loka þessa tímabils. Þetta kemur fram á vef stuðningsmanna Breiðabliks, blikar.is.

Kristinn Jónsson kemur til sinna gömlu félaga frá norska úrvalsdeildarliðinu Sogndal en áður hefur hann verið á mála hjá Sarpsborg í sömu deild og með Brommapojkarna í Svíþjóð. Kristinn var óheppinn en hann meiddist á undirbúningstímabilinu og hefur aðeins komið við sögu í einum leik með Sogndal í deildinni á þessu tímabili.

Kristinn er 26 ára gamall og er uppalinn hjá Breiðablik.  Hann hefur leikið 223 leiki með félaginu í meistaraflokki og skorað í þeim 15 mörk.  Hann var lykilmaður þegar liðið varð Íslandsmeistari 2010 og bikarmeistari 2011. 

Hann var valinn leikmaður ársins hjá Morgunblaðinu árið 2015 en hann hefur leikið 140 leiki í efstu deild þar sem hann er fimmti leikjahæsti leikmaður Breiðabliks frá upphafi.

Kristinn á að baki 8 A-landsleiki og alls 32 leiki með yngri landsliðum Íslands og skoraði þar 1 mark.  

• Blogga um frétt