Ég hélt að við yrðum betri

„Ég get ekki sagt að þetta hafi spilast eins og ég átti von á, ég hélt að við yrðum betri,“ sagði Bjarni Ólafur Eiríksson varnarjaxl Vals eftir 2:0 sigur á Grindavík að Hlíðarenda í dag þegar liðin mættust í 16. umferð Pepsi-deildar karla.

„Mér finnst Grindavík gott lið sem kann að spila fótbolta og við fengum að kenna á því, vorum eitthvað að reyna pressa þá framarlega í fyrri hálfleik en þeir bara sundurspiluðu okkur og við vorum heppnir að vera yfir í hálfleik.“

Þrautreyndur Bjarni Ólafur sagði sína menn enn með einbeitinguna í lagi. „Það hefur gengið hingað til að láta leikmenn halda einbeitingunni, verður bara að koma í ljós en þetta var ótrúlega mikilvægur sigur eins og reyndar allir leikirnir.  Við verðum bara að taka einn leik fyrir í einu.“

• Blogga um frétt