Strákarnir verða í strandbæ við Svartahaf

Klara Bjart­marz, fram­kvæmda­stjóri KSÍ, segir töluvert sé síðan sambandið valdi hvar það vildi hafa bækistöðvar sínar í Rússlandi næsta sumar. Íslenska landsliðið mun dvelja hótel Nadezhda í bænum Gelendzhik við Svartahafið á meðan HM stendur yfir.

Tæplega 55 þúsund manns búa í Gelendzhik en bænum er lýst sem ferðamanna- og strandbæ. Hótelið verður með besta móti, líkt og í Frakklandi fyrir tveimur árum.

Frá Gelendzhik. Ljósmynd/Wikipedia

Klara segir að Gunnar Gylfason, Helgi Kolviðsson og Þorgrímur Þráinsson hafi skoðað nokkra staði Gelendzhik hafi á endanum orðið fyrir valinu. Hún segir að starfsfólk KSÍ geri sér grein fyrir því að ferðalögin frá liðshótelinu í leiki gætu orðið býsna löng. Til að mynda eru tæplega 2.700 kílómetrar frá Gelendzhik til Jekateríanborgar, þar sem Ísland gæti leikið.

Það er langt frá Mosvku til Gelendzhik. Ljósmynd/Google maps

„Við gerum okkur grein fyrir því að við getum lent í löngum ferðalögum,“ segir Klara og bætir við að hugmyndafræðin sé svipuð og þegar landsliðið var með bækistöðvar í Annecy á EM í Frakklandi í fyrra.

Verður í mörg horn að líta

Framkvæmdastjórinn veit að það verður í mörg horn að líta næsta sumar og reynslan frá EM-ævintýrinu verður nýtt. 

„Það er alltaf eitthvað sem má betur fara og eitt af því sem við lærðum af Frakklandsævintýrinu er að við þurfum að vinna vel á tveimur vígstöðvum. Það er ekki nóg að fara með meirihlutann af skrifstofunni út og gera allt rosalega vel þar og á meðan eru tveir á skrifstofunni heima að vinna 24 tíma á sólarhring,“ segir Klara og bætir við að hugsanlega þurfi KSÍ að ráða fleira starfsfólk.

• Blogga um frétt