„Þær eru með mjög sterkt lið en eru auk þess með mikla og flotta sögu. Hafa unnið marga titla,“ sagði Rakel Hönnudóttir um þýska landsliðið sem Ísland mætir á morgun í undankeppni HM í knattspyrnu í Wiesbaden í Þýskalandi.
„Þýskaland er á meðal sterkari liða sem við höfum mætt. Ég hef spilað á móti Þjóðverjum fjórum eða fimm sinnum á landsliðsferlinum og þær eru yfirleitt mjög góðar. Þær eru nánast eins og vélmenni: vita nákvæmlega hvað þær eiga að gera og hvar samherjarnir eru. Liðið er vel æft og vel skipulagt,“ sagði Rakel enn fremur en hún sagði leikskipulag íslenska liðsins vera í vinnslu en eftir að landsliðið kom saman í Wiesbaden hafi verið farið smám saman yfir leik þýska liðsins.
„Við þurfum að öllum líkindum að spila meiri varnarleik en í mörgum öðrum landsleikjum. En við erum að fara yfir þýska liðið og okkar leikáætlun er í vinnslu,“ sagði Rakel Hönnudóttir þegar mbl.is ræddi við hana.