„Aldrei verið jafn ánægð“

„Ég held bara að ég hafi aldrei verið jafn ánægð,“ sagði varnarmaðurinn ungi, Ingibjörg Sigurðardóttir þegar mbl.is spurði hana hvernig henni leið þegar flautað var til leiksloka á Brita-leikvanginum í Wiesbaden í gær þar sem Ísland kom öllum á óvart og vann Þýskaland 3:2 í undankeppni HM. 

Ingibjörg var ein þriggja miðvarða í vörn Íslands í leiknum. Eftir að Þýskaland minnkaði muninn í 3:2 á 87. mínútu reyndi verulega á varnarmennina á lokamínútunum. 

„Ég get alveg viðurkennt að þetta var stressandi. En á heildina litið var ótrúlega gaman að spila þennan leik og sjá baráttuna í okkar liði. Þegar Þjóðverjarnir voru komnar með fjóra leikmenn í sóknina þá fannst manni þýskir leikmenn vera úti um allt. Þá var þetta mjög erfitt en einhvern veginn tókst okkur að komast í gegnum þetta,“ sagði Ingibjörg sem hefur stimplað sig hratt inn í landsliðið á þessu ári. 

Ingibjörg Sigurðardóttir mbl.is/Kristinn Magnússon

• Blogga um frétt