Tékkinn Karel Rada stýrir tékkneska landsliðinu í dag. Þjálfaraferill Rada er ekki langur en hann átti hins vegar flottan feril sem leikmaður og vann til silfurverðlauna með Tékkum á EM 1996.
Rada spilaði sem vinstri bakvörður í úrslitaleiknum 1996 gegn Þýskalandi á Wembley sem Þjóðverjar unnu á gullmarki Oliver Bierhoff.
Rada á auk þess ágætar minningar gegn Íslendingum en hann spilaði með Tékkum í 4:0 sigri á Íslendingum í Tékklandi í undankeppni HM 2002.
Síðar í keppninni vann Ísland hins vegar frábæran sigur á Tékkum 3:1 á Laugardalsvelli. Rada slapp hins vegar við þá útreið og tók ekki þátt í leiknum.