Sölvi Geir Ottesen var nú í hádeginu kynntur til leiks sem nýr leikmaður Víkings R. í knattspyrnu og skrifar hann undir þriggja ára samning við félagið sem hann yfirgaf árið 2004 þegar hann hélt út í atvinnumennsku.
Sölvi Geir er 33 ára gamall og gekk í raðir Djurgården í Svíþjóð frá Víkingi árið 2004. Síðan þá hefur hann einnig leikið með dönsku liðunum SønderjyskE og FC København, Ural í Rússlandi, kínversku liðunum Jiangsu Sainty, Wuhan Zall og Guangzhou R&F og með liði Buriram United í Taílandi.
Sölvi hefur spilað 28 leiki með íslenska A-landsliðinu og lék síðast með því gegn Finnum í byrjun árs 2016.
Víkingar, undir stjórn Loga Ólafssonar, enduðu í 8. sæti Pepsi-deildarinnar síðasta sumar, og í tilkynningu frá félaginu er lýst yfir mikilli ánægju með að fá Sölva heim.
„Víkingur lýsir yfir mikilli ánægju með að Sölvi sé nú kominn aftur heim og stefni á að ljúka þessum glæsilega ferli á sama stað og hann hófst,“ segir í tilkynningu Víkinga.