Arconada var heiðursgestur

Santi Cazorla fagnar sigri Spánverja á EM. Reuters

Úrslitaleikurinn í gær var sá fyrsti sem Spánverjar leika síðan þeir spiluðu við Frakkland á EM 1984. Þar voru það Frakkar sem urðu hlutskarpari og unnu 2:0. Fyrra mark leiksins skoraði Michael Platini, sem er núverandi forseti Knattspyrnusambands Evrópu, UEFA.

Seinna markið gerði Bruno Bellone. Markið sem Platini skoraði þótti afar vandræðalegt fyrir markvörð Spánar, Luis Arconada, sem gerði klaufaleg mistök og færði Platini markið nánast að gjöf. Í kjölfarið var oft talað um það í Frakklandi að „skora Arconada-mörk“ ef markvörður gerði klaufaleg mistök.

Á úrslitaleiknum í gær þótti skemmtilegt að Luis Arconada og Michael Platini sátu hlið við hlið í stúkunni á leiknum. Hafði Platini ákveðið að vera flottur á því og bauð Arconada sérstaklega á leikinn. Nú gat sá síðarnefndi glaðst. Það hefur hins vegar verið nokkuð sérstakt fyrir Platini að afhenda Spánverjum loksins bikarinn sem hann hirti af þeim fyrir 24 árum og Spánverjar hafa beðið eftir allan þennan tíma.