Marwijk: Sumir hreinlega ekki í formi

Bert van Marwijk ásamt Rafael van der Vaart. AFP

Bert van Marwijk landsliðsþjálfari Hollendinga var brúnaþungur eftir tap sinna manna gegn Þjóðverjum á EM í kvöld. Hollendingar hafa tapað báðum leikjum sínum en eiga samt enn veika von um að komast í átta liða úrslitin.

„Við töpuðum á móti mjög góðu liði og ef þú ætlar að vinna Þjóðverja þá þarf allt liðið að spila vel. Í kvöld voru margir langt frá sínu besta og sumir þeirra eru hreinlega bara ekki í formi. Við byrjuðum ágætlega en síðan fór allt úrskeiðis hjá okkur í varnarleiknum,“ sagði Marwijk.

Hollendingar mæta Portúgölum í lokaumferð B-riðilsins og verða að vinna með tveggja marka mun og stóla á að Danir tapi fyrir Þjóðverjum til að eiga möguleika á að fara áfram.