Nærvera Benzema hefði skapað vandræði
Setja bókamerki
Franski sóknarmaðurinn Karim Benzema getur engum nema sjálfum sér um kennt að hann er ekki í leikmannahópi Frakka fyrir Evrópumótið sem hefst eftir tvo daga í Frakklandi.
Þetta er mat fyrrverandi varnarmanns franska liðsins, Marcel Desailly, en hann varð heims- og Evrópumeistari með Frökkum á leikmannaferli sínum. „Það er örugglega of mikið fyrir franska knattspyrnusambandið að hafa einhvern með sem gæti skapað vandræði. Benzema myndi ekki sjálfur skapa vandræði en nærvera hans myndi gera fréttamönnum kleift að skrifa óþægilegar fréttir, tengdar honum,“ sagði Desailly.
Opinber skýring á fjarveru Benzema í hópnum er sú að framherjinn er talinn hafa átt hlut að máli í fjárkúgun glæpagengis gagnvart Mathieu Valbuena, liðsfélaga hans hjá franska liðinu. Benzema telur hins vegar að Dider Deschamps, þjálfari franska liðsins, hafi látið undan þrýstingi franskra þjóðernissinna.
„Það var því ákveðið að það væri betra að taka Benzema ekki með. Slíkar ákvarðanir eru þjálfurum alltaf erfiðar,“ bætti Desailly við.
