Markvörður Englendinga slakastur
Setja bókamerki
Joe Hart, markvörður enska landsliðsins í knattspyrnu, var slakastur á síðustu æfingu liðsins, en sá leikmaður sem er slakastur hverju sinni þarf að vera með lukkudýrið á bakinu fram að næstu æfingu liðsins.
Enska liðið undirbýr sig af kappi fyrir leikinn gegn Íslandi í 16-liða úrslitum Evrópumótsins sem fer fram í Frakklandi. Leikurinn fer fram í Nice annað kvöld en Roy Hodgson, þjálfari Englands, skoðaði leikvanginn ásamt leikmönnum liðsins í dag.
Það er hefð í enska liðinu á þessu móti að sá leikmaður sem er slakastur á æfingum þarf að bera tusku- og lukkudýrið Leo á bakinu fram að næstu æfingu.
Joe Hart, markvörður enska liðsins, var slakastur á síðustu æfingu liðsins, en það boðar vonandi gott fyrir leikinn á morgun að hann sé ekki heitur þessa stundina.
Jack Wilshere, John Stones, Wayne Rooney og Chris Smalling hafa allir sést með ljónið á sér en nú hefur Hart tekið við keflinu.
