Gunnleifur Gunnleifsson, markvörður Breiðabliks, sem lengi átti sæti í íslenska landsliðinu í knattspyrnu, getur ekki þegið boð um að fara til Parísar og sjá viðureign Íslands og Frakklands á EM í fótbolta á sunnudaginn. Hann þarf sama dag að leika með félögum sínum í Breiðabliki gegn ÍBV í Borgunarbikarnum.
Gunnleifur þakkar í dag á twittersíðu sinni Vífilfelli fyrir að hafa boðið þeim hjónum á leikinn í París á sunnudaginn. Hann segist því miður ekki geta þegið boðið vegna leiksins.
Gunnleifur átti árum saman sæti í íslenska landsliðinu og var m.a. fastamaður í landsliðshópnum í undankeppni EM. Hann hlaut hins vegar ekki náð fyrir augum landsliðsþjálfaranna þegar hópurinn fyrir Frakklandsferðina var valinn.
Margir skoruðu á KSÍ að bjóða Gunnleifi á leikinn á sunnudaginn.
Leikur Breiðabliks og ÍBV í Borgunarbikarnum hefst klukkan 14 á sunnudaginn á Kópavogsvelli. Fimm tímum síðar hefur íslenska landsliðið leik gegn franska landsliðinu á Stade de France í St. Denis í 8-liða úrslitum EM.
Langar að þakka Coke/Vífilfell fyrir að hafa samband við mig og bjóða okkur hjónum á leikinn í Paris. Leikur við ÍBV á sun.kemst því ekki🇮🇸
— G Gunnleifsson (@GulliGull1) June 29, 2016