Við viljum liðsanda Íslands
Sindri Sverrisson
Setja bókamerki
Tengdar fréttir
Ísland á EM í Hollandi 2017
„Fortíðin er að baki. Morgundagurinn er mikilvægastur,“ sagði Martina Voss-Tecklenburg, þjálfari kvennalandsliðs Sviss í knattspyrnu, spurð um takið sem liðið virðist hafa haft á Íslandi.
Liðin mættust þrisvar á árunum 2013-2015 og vann Sviss alla leikina, án þess að fá á sig mark. Í undankeppni HM 2015 vann Sviss 2:0-sigur á Laugardalsvelli en 3:0-sigur á heimavelli, og Sviss vann svo 2:0-sigur í Algarve-bikarnum 2015. Voss-Tecklenburg lét hins vegar ekki teyma sig út í neinar yfirlýsingar um ágæti eigin liðs:
„Það er eins og glíma við Herkúles að vinna víkingana. Við viljum liðsandann sem Ísland hefur og verðum að gefa allt okkar á morgun,“ sagði þjálfarinn þýski.
Spurð út í tapið gegn Austurríki á þriðjudag, liðinu sem spáð var neðsta sæti riðilsins, svaraði Voss-Tecklenburg:
„Þetta er ný staða fyrir liðið, að vera talinn betri og eiga að vinna lið eins og Austurríki og Ísland. Liðið fór á HM í Kanada 2015, sitt fyrsta stórmót, en þá voru leikmenn ekki eins taugaóstyrkir og núna. Eftir mistök í byrjun leiks náði liðið sér aldrei á strik gegn Austurríki.“
Tengdar fréttir
Ísland á EM í Hollandi 2017
