Ísland í 10. sæti eftir jafntefli Ungverja

Ungverjinn Gábor Császar skýtur að marki Króata í leiknum í kvöld. Reuters

Ungverjar og Króatar gerðu í kvöld jafntefli, 24:24, í síðasta leiknum í milliriðli tvö á Evrópumótinu í handknattleik í Novi Sad. Þar með náðu Ungverjar fjórða sætinu í riðlinum og enda í 7.-8. sæti en Ísland hafnar í fimmta sæti riðilsins og í 10. sæti keppninnar í heild.

Króatar höfðu þegar  tryggt sér sæti í undanúrslitum mótsins en þeir urðu í öðru sæti riðilsins og mæta Serbum í undanúrslitum á föstudagskvöldið.

Spánverjar fengu 9 stig í riðlinum, Króatar 7, Slóvenar 4, Ungverjar 4, Íslendingar 3 og Frakkar urðu neðstir, einnig með 3 stig.

Pólland hafnaði í 5. sætinu í hinum milliriðlinum en fékk fleiri stig en Ísland og er því í 9. sæti og Ísland í því tíunda.