„Getum borið höfuðið hátt“
Guðjón Valur Sigurðsson í leiknum við Frakka í gær. Reuters
„Sem atvinnumaður í handknattleik vil ég vinna alla leiki sem ég fer í hvort sem það er með félagsliði mínu eða landsliðinu. Það tekst því miður ekki alltaf en velta má því fyrir sér hvort við höfum nokkuð slagkraft til að ná miklu lengra um þessar mundir,“ sagði Guðjón Valur Sigurðsson, fyrirliði íslenska landsliðsins, við Morgunblaðið eftir leikinn við Frakka á EM í handknattleik í gær.
„Það er með ólíkindum hvað Spánverjar og Frakkar hafa til dæmis mikið úrval af stórum og sterkum leikmönnum sem þeir finna einhvers staðar. Samt tekst okkur að spila góða leiki gegn þeim að undanskildu fyrsta korterinu gegn Spánverjunum. Við getum borið höfuðið hátt. Ég er stoltur af strákunum, hvernig hugarfar þeirra hefur verið og hvernig þeir búa sig undir leikina. Samstaðan hefur verið góð og það skiptir mestu máli þegar við horfum fram á strangt keppnistímabil með vonandi fjórum mótum næsta árið að HM meðtöldu.
Nánar er rætt við Guðjón og fjallað um þátttöku Íslands á EM í íþróttablaði Morgunblaðsins í dag.
