Betra fyrir Íslendinga ef Danir verða meistarar

Danir fagna sigrinum gegn Spánverjum í kvöld. Reuters

Íslendingar ættu að vonast til þess að Danir hampi Evrópumeistaratitlinum í handknattleik á sunnudaginn þegar þeir etja kappi við heimamenn í Serbíu í úrslitaleiknum.

Fari Danir með sigur af hólmi munu Íslendingar lenda í auðveldari riðli í forkeppni fyrir Ólympíuleikana en þeir færu þá í riðil með Króötum, Japönum og Sílemönnum.

Ef Serbar verða Evrópumeistarar fara Íslendingar hins vegar í riðil með Spánverjum, Slóvenum og Brasilíumönnum.

Tvö efstu liðin í riðlum forkeppninnar tryggja sér sæti á Ólympíuleikunum í London.