EM: Christiansen hættir eftir ÓL

Lars Christiansen fagnar einu að 1.500 mörkum sínum fyrir danska landsliðið. Reuters

Danski hornamaðurinn Lars Christiansen ætlar ekki að gefa kost á sér í danska landsliðið í handknattleik eftir Ólympíuleikana í London. Ef danska landsliðið kemst á leikana segir Christiansen að endi verði bundinn á 20 ára feril með landsliðinu.

Christiansen er leikreyndasti og markahæsti leikmaður danska landsliðsins. Hann á að baki 336 landsleiki og í þeim síðasta, gegn Svíum á EM á miðvikudagskvöldið, skoraði hann sitt 1.500. landsliðsmark.

Christiansen ætlar að leika áfram með Kolding fram á mitt árið 2013. Lengst af sínum ferli lék hann með Flensburg í Þýskalandi. 

Christiansen verður fertugur á árinu. Hann segir það lengi hafa verið markmið sitt að hætta með landsliðinu á þessu ári með því að taka þátt í Ólympíuleikum.