Drogba fékk þriggja leikja bann

Didier Drogba, sóknarmaður Chelsea, var í dag úrskurðaður í þriggja leikja bann af enska knattspyrnusambandinu, fyrir að kasta smápeningi í stuðningsmenn Burnley í leik liðanna í deildabikarnum í síðustu viku.

Drogba kom Chelsea yfir á 27. mínútu og fékk þá í sig smápening sem kastað var úr hópi stuðningsmanna Burnley. Framherjinn benti ógnandi í áttina til þeirra áður en hann kastaði peningnum til baka. Enginn tilkynnti um að hafa orðið fyrir áverka af hans völdum.

Drogba missir af heimaleikjum Chelsea gegn Newcastle og Arsenal og útileik gegn Bolton. Næsti deildaleikur hans yrði því í fyrsta lagi þann 14. desember þegar Chelsea tekur á móti West Ham á Stamford Bridge.

• 1 blogg um fréttina

Bloggað um fréttina

• Rúnar Haukur Ingimarsson: Bara 3 leikja bann ?