Fabregas tekur við fyrirliðabandinu hjá Arsenal

Arsene Wenger ásamt Cesc Fabregas. Reuters

Spánverjinn Cesc Fabregas hefur verið skipaður tímabundið fyrirliði Arsenal í stað Frakkans Williams Gallas en Arsene Wenger knattspyrnustjóri Arsenal ákvað að svipta Gallas fyrirliðastöðunni eftir harkalega gagnrýni á liðsfélaga sína í síðustu viku.

Gallas var settur út úr leikmannahópnum fyrir leikinn gegn Manchester City á laugardaginn sem Arsenal tapaði 3:0 en Wenger tjáði fréttamönnum í dag að Gallas yrði með liðinu í Meistaradeildarleiknum gegn Dynamo Kiev sem fram fer annað kvöld.