Fellaini missir af leiknum gegn Chelsea

Fellaini fagnar marki með Everton. Reuters

Belginn hárprúði Marouane Fellaini getur ekki leikið með Everton annað kvöld þegar liðið tekur á móti toppliði Chelsea í ensku úrvalsdeildinni í knattspyrnu.

Fellaini meiddist á ökklanum í leiknum gegn Liverpool á laugardaginn eftir tæklingu við Grikkjann  Sotirios Kyrgiakos. Í fyrstu var óttast að hann hefði fótbrotnað en svo reyndist ekki. Hann verður hins vegar ekki leikfær annað kvöld og óvíst er hvenær hann getur spilað á ný en belgíski miðjumaðurinn hefur verið mjög öflugur í liði Everton á tímabilinu.