Ferdinand dregur áfrýjun til baka

Rio Ferdinand er hálfnaður með bannið. Reuters

Rio Ferdinand, miðvörður Manchester United og enska landsliðsins, hefur dregið til baka áfrýjun vegna aukaleikbannsins sem aganefnd enska knattspyrnusambandsins setti hann í á dögunum.

Ferdinand fékk þá þriggja leikja bann fyrir að slá Craig Fagan, leikmann Hull City, og aganefndin bætti við fjórða leiknum eftir að hann áfrýjaði úrskurðinum. Sú áfrýjun þótti ekki á rökum reist.

Ferdinand áfrýjaði að nýju, en þar sem hann hefði líklega ekki borið annað úr býtum en að fá fimmta leikinn í bann, hefur hann nú dregið það til baka.

Miðvörðurinn öflugi á eftir að taka út bann í deildaleikjum gegn Aston Villa og Everton en verður til taks fyrir úrslitaleik deildabikarsins, gegn Aston Villa.