Slær United met í Meistaradeildinni?

Dimitar Berbatov framherji Manchester United. Reuters

Takist Manchester United að halda marki sínu gegn Valencia í Meistaradeildinni á Old Trafford annað kvöld slær liðið met en það verður þá í fyrsta skipti sem lið fer í gegnum riðlakeppnina án þess að fá á sig mark.

Manchester United og Valencia eru þegar búin að tryggja sér sæti í 16-liða úrslitum Meistaradeildarinnar. United hefur 13 stig í fyrsta sæti en Valencia er með 10 í öðru sæti. Valencia á möguleika á að skáka United úr efsta sætinu og vinna riðilinn með því að leggja Manchester United að velli, 1:0. Þá yrðu liðin jöfn að stigum og jöfn staða í innbyrðisviðureignum en markatala spænska liðsins er mun betri.