Best frá keppni í sex vikur

Leon Best, sóknarmaður Newcastle. Reuters

Írski framherjinn Leon Best leikur ekki með Newcastle í ensku úrvalsdeildinni í knattspyrnu næstu sex vikurnar eða svo en hann meiddist á hné í leik liðsins við Aston Villa í gær.

Alan Pardew knattspyrnustjóri Newcastle staðfesti þetta við Sky Sports en Best þurfti að fara af velli strax á 14. mínútu eftir harðan árekstur við Stephen Warnock, varnarmann Villa. Pardew sagði að liðbönd hefðu tognað í hnénu og vanalega tæki það um sex vikur að jafna sig.

Hann staðfesti jafnframt að varnarmaðurinn Ryan Taylor væri óbrotinn en hann þurfti líka að yfirgefa völlinn í fyrri hálfleik í gær, meiddur á ökkla.