Ferdinand: Missti alla virðingu fyrir Suárez

Luis Suárez og Rio Ferdinand í leiknum í dag. Reuters

Rio Ferdinand, miðvörður Englandsmeistara Manchester United, segist hafa misst alla virðingu fyrir Luis Suárez, framherja Liverpool, þegar hann var spurður að því hvers vegna hann hefði neitað að taka í hönd Úrúgvæans fyrir leik United og Liverpool í dag.

„Mér fannst þetta vera dapurleg ákvörðun hjá honum,“ sagði Ferdinand við MUTV-sjónvarpsstöðina en Ferdinand ákvað að taka ekki í hönd Suárez eftir að Úrúgvæinn neitaði að taka í höndina á Patrice Evra.

„Eftir að hafa séð hann neita að taka í höndina á Evra ákvað ég að sleppa því að rétta honum höndina. Hann fékk ekki þá virðingu sem hann þurfti á að halda í þessari stöðu og að viðurkenna að hann gerði mistök og biðjast afsökunar. Ég tapaði allri virðingu fyrir honum eftir þetta.“

Gríðarlega margir hafa viðrað skoðun sína á uppákomunni fyrir leikinn og eru flestir sammála um að Suárez hafi hagað sér heimskulega með því að neita að taka í hönd Evra.