Stoke áfrýjar brottvísun Delaps

Rory Delap, til vinstri, er á leið í bann að öllu óbreyttu. Reuters

Stoke City hefur áfrýjað rauða spjaldinu sem Rory Delap fékk í bikarleik liðsins gegn Crawley Town í ensku bikarkeppninni í knattspyrnu í gær.

Delap fékk rauða spjaldið eftir aðeins 18 mínútna leik fyrir að tækla leikmann D-deildarliðsins hressilega, með takkana á lofti. Tony Pulis knattspyrnustjóri Stoke mótmælti ákvörðun Mike Jones dómara harðlega og fór ófögrum orðum um frammistöðu þeirra eftir leikinn, sem Stoke náði þó að vinna, 2:0.

Delap á yfir höfði sér þriggja leikja bann og yrði ekki með gegn Swansea, Norwich og Chelsea í úrvalsdeildinni.

Stoke áfrýjaði svipuðu atviki á dögunum en þá fékk Robert Huth brottvísun og þriggja leikja bann vegna tæklingar. Þeirri áfrýjun var vísað frá.