Rooney spilar ekki

Wayne Rooney. AP

Wayne Rooney verður ekki með Englandsmeisturum Manchester United þegar þeir etja kappi við Ajax í síðari viðureign liðanna í 32-liða úrslitum Evrópudeildar UEFA á Old Trafford annað kvöld.

Að því er fram kemur á vef Manchester United er Rooney með særindi í hálsi og æfði ekki í dag. Búlgarinn Dimitar Berbatov hefur hins vegar hrist af sér meiðsli og er leikfær.

,,Rooney spilar ekki á morgun. Hann hefur verið slappur frá því í leiknum í Amsterdam og var í rúminu mest alla helgina. Við reynum eftir fremsta megni að koma honum af stað fyrir leikinn á sunnudaginn,“ segir Alex Ferguson en þá mætir nýliðum Norwich.