Mancini neitar að afskrifa titilinn

Roberto Mancini, knattspyrnustjóri Man. City. AFP

„Við stóðum okkur vel því þetta var erfitt,“ sagði Roberto Mancini knattspyrnustjóri Manchester City eftir 1:0 sigurinn á Aston Villa á útivelli í kvöld þar sem Carlos Tévez skoraði sigurmarkið.

City er þar með 12 stigum á eftir toppliði Manchester United líkt og fyrir helgi, og Mancini vonast til að sínir menn framkalli kraftaverk líkt og í fyrra þegar þeir lönduðu Englandsmeistaratitlinum eftir magnaðan endasprett.

„Það var mikilvægt að halda forskoti United í 12 stigum, og það er ekkert hægt að útiloka nú þegar 10 leikir eru eftir. Ef við höldum áfram að vinna er aldrei að vita, þannig er fótbolti,“ sagði Mancini. „Það datt engum í hug í fyrra að þetta væri hægt í fyrra en þetta eru 12 stig í 10 leikjum. Ef þeir tapa fjórum...“ bætti Ítalinn við.

Mancini staðfesti einnig að Jack Rodwell hefði tognað aftan í læri í leiknum og yrði frá keppni næstu 3-4 vikurnar.