Beckham fór grátandi af velli

Enski knattspyrnumaðurinn David Beckham réð ekki við tilfinningarnar í gærkvöld og fór hágrátandi af velli þegar honum var skipt út af í lokaleik sínum á heimavelli á ferlinum, með París SG gegn Brest í frönsku 1. deildinni.

Leikurinn var stöðvaður um stund á 81. mínútu þegar Beckham var kallaður af velli. Hann var fyrirliði Parísarliðsins í leiknum og leikmennirnir röðuðu sér upp og klöppuðu fyrir honum þegar hann gekk út af vellinum í hinsta sinn.

Þetta var lokaleikur París SG á heimavelli og forseti félagsins sagði eftir leikinn að þetta hefði væntanlega verið lokaleikurinn á ferli Beckhams því hann myndi að óbreyttu ekki spila útileikinn gegn Lorient í lokaumferðinni.

París SG vann leikinn 3:1 og Beckham kvaddi með því að leggja upp eitt markanna sem Blaise Matuidi skoraði beint eftir hornspyrnu Englendingsins.