„Hefði gengið frá okkur að kaupa Shaw“

Jose Mourinho er feginn að hafa misst af Luke Shaw.
Jose Mourinho er feginn að hafa misst af Luke Shaw. AFP

Jose Mourinho, knattspyrnustjóri Chelsea, segist feginn því að hafa ekki náð að klófesta enska bakvörðinn Luke Shaw frá Southampton, sem síðan fór til Manchester United fyrr í sumar.

Chelsea reyndi að kaupa hinn 19 ára Shaw í janúar, en háar launakröfur hans fældi liðið að lokum frá. Liðið krækti þess í stað í Brasilíumanninn Filipe Luis frá Atlético Madrid, og borgar honum að sögn einungis um þriðjung af því sem Shaw vildi í laun.

„Ef við hefðum borgað þessum 19 ára strák það sem hann vildi væri búið að ganga frá okkur. Við hefðum rústað stöðugleikanum, bæði í búningsklefanum og í fjármálunum. Ef þú borgar 19 ára strák svona fjárhæðir þá fara aðrir að banka á dyrnar og krefjast þess sama,“ sagði Mourinho.

mbl.is
Fleira áhugavert
Fleira áhugavert