Diego Costa átti stóran þátt í öllum mörkum Chelsea þegar liðið vann 3:1-sigur á Vitesse Arnhem í æfingaleik í Hollandi í gærkvöld.
Costa lagði upp fyrsta markið fyrir Mohamed Salah sem skoraði auðveldlega í autt markið. Hann fiskaði svo aukaspyrnu um miðjan fyrri hálfleik sem Cesc Fábregas skoraði úr en þetta var fyrsta mark Fábregas fyrir Chelsea.
Chelsea komst svo í 3:0 korteri fyrir leikslok þegar Costa átti sendingu á Nemanja Matic sem skoraði. Heimamenn náðu að minnka muninn í blálokin en þá var Mitchell Beeney kominn í markið í stað Petr Cech.